04.04.2025 - 10:00

Lækkandi bilasølan bendir á varsemi hjá húsarhaldunum

Bilameingin (bilaparkin) hevur staðið í stað seinastu trý árini, og sølan av nýggjum og brúktum bilum er lægri seinastu trý árini, sum týðir uppá, at fólk eru vorðin meira varin við at gera stór keyp.

Nýtslan hjá húsarhaldunum er ein stórur partur av samlaða eftirspurninginum í føroyska búskapinum. Uppgerðin av privatunýtsluni er tó ikki so neyv, og tí verður hildið eyga við viðurskiftum, sum sannlíkt ávirka nýtsluna jaliga og neiliga. Eitt av hesum viðurskiftum er bilasølan.

Bilasølan kann geva ábendingar um privatu nýtsluna í síni heild. Tá ið fólk gerast meira varin, gongur tað serliga útyvir drúgvar vørur, og serliga størru íløgurnar, so sum bilar. Fólk kunnu útseta at keypa sær nýggjan bil, ella tey kunnu velja at keypa ein brúktan bil ístaðin fyri ein nýggjan.

Seinastu trý árini er árliga bilasølan lækkað við ávikavist 17%, 4% og og seinasta árið við 6%, sí eisini myndina niðanfyri. Í 2020 vóru 17% av seldu bilunum nýggir, meðan í 2024 vóru 11% nýggir bilar. Ein størri prosentpartur av bilasøluni er søla av brúktum bilum. Líkt er til, at sama mynstur, sum Búskaparráðið vísti á í Várfrágreiðingin í 2024, heldur fram. Samlað sæð verða færri bilar seldir og ein størri partur av samlaðu bilasøluni er brúktir bilar.

Atferðarmynstrið hjá bilkeyparanum vísir, at keyparin er viðkvæmur fyri broytingum í stuðulsskipanum, tí sølutølini vísa, at fleiri sølur vera gjørdar upp til stuðulsskipanin verður broytt, eitt nú tá mvg-afturberingin til elbilar bleiv broytt 1. apríl 2024 og aftur 1. januar 2025. Tað er tí eisini vert at leggja afturat, at tað kann hugsast, at fólk hava valt at gera eina íløgu í at skifta yvir til eina grønu orkuskipan, tí tann stuðulsskipanin varð eisini broytt 1. januar 2025, í staðin fyri at skifta bilin út, og tað kann hava havt eina ávirkan á samlaða talið av bilasølum. 

Mynd 1 Bilasøla til privata nýtslu

 

Viðm.: Ein lítil mangul er í tølunum av seldum leigubilum, tí nakrar skrásetingar manglar. Tær telja tó einans 5.7% av samlaðu bruktbilasøluni í 2023. Tí skal væntast at brúktbilasølaner eitt lítið vet hægri   í 2024 enn víst her. Kelda: Akstovan

Les várfrágreiðingina hjá búskaparáðnum her.