24. november 2016 varð løgtingslóg nr. 116 um Landsbanka Føroya og Føroya váðaráð lýst, og harvið var Landsbankin stovnaður aftur frá 1. januar 2017.
Grein 1 í lógini sigur, at Landsbanki Føroya er almennur fíggjarstovnur og greiningarstovnur, ið virkar fyri fíggjarligum støðufesti í Føroyum.
Umframt at virka sum almennur fíggjarstovnur og greiningarstovnur er landsbankin eisini skrivstova hjá Føroya váðaráð, sambært grein 24 í lógini og somuleiðis, við lógarbroyting frá mai 2021, eisini skrivstova hjá Búskaparráðnum. Nevndin í landsbankanum er samstundis búskaparráð, sambært grein 2 í lógini um Búskaparráð.
Landsbankin er harumframt fyrisiting hjá Arbeiðsmarknaðareftirlønargrunninum (AMEG), og stjórin í landsbankanum er eisini stýrisformaður í AMEG.
Og í løgtingslóg nr. 81 frá 2011 um Búskapargrunn Føroya stendur at landsbankin umsitir grunnin.
Link til tær ymisku lógirnar eru niðafyri.