Nevndin er skipað við 5. Nevndarlimir eru valdir í eitt trý ára tíðarskeið í senn og kunnu í mesta lagi veljast fýra ferðir.
Í minsta lagi tríggir nevndarlimir skulu vera búskaparfrøðingar við kandidatútbúgving frá hægri lærustovni. Nevndarlimirnir skulu hava fakligar førleikar innan eitt ella fleiri av økjunum: búskaparfrøði, fígging og kredittmeting, føroyskt vinnulív og skulu eisini hava innlit í føroyska fíggjargeiran ella búskapin í Føroyum.
Landsstýrismaðurin í fíggjarmálum setur nevndarlimirnar eftir tilmæli frá stýrinum fyri Fróðskaparsetur Føroya. Landsstýrismaðurin velur formannin.
Nevndarlimir
Johnny í Grótinum, formaður.
Johnny í Grótinum er námslektari í búskaparfrøði á Fróðskaparsetur Føroya. Johnny er útbúgvin cand.polit frá Københavns Universitet í 2003. Hann hevur drúgvar arbeiðsroyndir innan leiðslu og virðisbrævaumsiting frá bankum umframt leiðsluroyndir frá almennum stovnum. Johnny hevur sostatt holla vitan um føroyska fíggjargeiran og búskapin. Umframt starvið sum námslektari á Setrinum, er Johnny í Grótinum stjóri í egnari fyritøku, sum ber navnið Í Grótinum.
Anja Rein hevur eina diplomútbúgving innan banka og leiðslu, og er stjóri í Demich. Anja er eisini nevndarlimur í Jarðhita.
Jan Otto Holm, nevndar-/ráðslimur. Jan Otto Holm er útbúgvin Cand.merc. innan fígging og roknskap í 1995. Hann hevur arbeitt innan virðisbræva- og fíggjarognarumsiting hjá bankum og tryggingarfeløgum í Føroyum og í Danmark. Í dag hevur Jan Otto sítt egna virki, Sp.f. JOSH, sum veitir ráðgeving innan fíggjar- og íløguvirðuskifti. Harumframt undirvísir Jan Otto á handilsskúlanum og bankaskúlanum. Hann hevur sostatt holla vitan um føroyska fíggjargeiran, tryggingarvirksemi og búskapin. Jan Otto Holm er harumframt Nevndarformaður í KJ Hydraulik og íløgustjóri í Lívsverk.
Marjun Weihe Thomassen, kandidatútbúgving í búskaparfrøði, og er stjóri í Landsverk. Sum stjóri í Landsverk er Marjun W. Thomassen forkvinna í Byggiharrasamtak Føroya, Forkvinna í Tunnel society og forkvinna í NVF Føroyar (Nordic Road Association)
Hans Ellefsen, phd. og lektari í búskaparfrøði. Hann er varadekanur á Søgu- og Samfelagsdeildini á Fróðskaparsetri Føroya, har hann millum annað granskar í umsiting og býti av felags uppsjóvarfiskatilfeingi í Norðuratlantshavi. Eisini hevur hann granskað í útluting av fiskirættindum og tilfeingisrentu í fiskivinnu og aling. Hans hevur m.a. arbeitt í Landsbankanum, Føroya Banka og Fiskimálaráðnum. Hans hevur sostatt holla vitan um føroyska fiskivinnu og búskapin sum heild. Hann hevur part í felagnum Í/F Hans Ellefsen og Annleyg Lamhauge, sum fæst við ráðgevara uppgávur.
