04.04.2025 - 10:00

Bjartskygnið hjá húsarhaldunum er lækkað eitt vet

Nýtslan hjá húsarhaldunum er millum annað tengd at teirra bjartskygni, ið verður lýst við vísitølum í konjunkturbarometrinum, sum er ein brúkarakanning hjá Hagstovu Føroya. Vísitalið vísir millum annað, hvussu brúkarin metir búskaparstøðuna vera.

Nýtslan hjá húsarhaldunum er ein stórur partur av samlaða eftirspurninginum í føroyska búskapinum. Uppgerðin av privatunýtsluni er tó ikki so neyv, og tí verður hildið eyga við viðurskiftum, sum sannlíkt ávirka nýtsluna jaliga og neiliga. Eitt av hesum viðurskiftum eru vísitølini í konjunkturbarometrinum hjá Hagstovuni.

Treystið hjá føroysku húsarhaldunum er lækkað eitt vet; í nýggjastu kanning var tað -12, sí myndina. Hóast metingin hjá húsarhaldunum um teirra fíggjarstøðu seinastu og komandi 12 mánaðirnar kvinkar eitt vet upp, umframt at eitt sindur fleiri húsarhald svara, at tey vænta at gera størri keyp komandi árið, ger negativa metingin hjá húsarhaldunum um búskaparstøðuna í Føroyum komandi 12 mánaðirnir, at brúkaraávísin kvinkar niður í nýggjastu brúkarakanningini.

Vísitalið minkaði eisini nógv í 2022; tá minkaði tað niður í -17, men síðani tá hevur gongdin verið uppeftir gangandi, hóast tað framvegis er undir miðal.

Vísitalið hevur fyrr verið enn lægri enn tað er í løtuni; í fíggjarkreppuni í 2008 var vísitalið -37. Samanumtikið hevur brúkaraávísin verið undir miðal síðani mitt í 2022, ið millum annað kann síggjast í ljósinum av stórum príshækkingum á nýtsluvørunum hjá húsarhaldunum og einari spentari geopolitiskari støðu, ið hevur stórar óvissur knýttar at sær.

Mynd 1 Brúkaraávísi 2019-2025

  Viðm.: "Miðal" er miðal av mátungum frá 2006 til 2025. Kelda: Hagstova Føroya

Les várfrágreiðingina hjá búskaparáðnum her.