Føroyingar kunnu nú gleðast um, at skuldarbyrðan hjá landskassanum er minkað við 500 mió. kr.
10. juni fyri 20 árum síðani undirskrivaðu táverandi landsstýrið og danska stjórnin eina avtalu í sambandi við bankamálið. Grein 2 í avtaluni snýr seg um skuldina hjá landskassanum. Avtalan hevði við sær at:
- Góðar 4 mia. kr. vóru umskipaðar til eitt 20 ára lán til danska statin.
- 900 mió. kr. vóru eftirgivnar í skuldini og
- 500 mió. kr. vóru givnar, sum eitt rentu- og avdráttar frítt lán í 20 ár.
Tær 500 mió. kr. skuldu tó bara rindast aftur til danska statin, um Føroyar í juni í ár høvdu inntøku frá at vinna olju burturúr undirgrundini. Tað hava Føroyar ikki.
Danska fíggjarmálaráðið kunnaði hósdagin 7. juni fíggjarnevndina hjá Fólkatinginum um, at føroyska lánið á 500 mió. kr. dettur burtur sambært avtaluni frá 1998. Fíggjarnevndin tók kunningina til eftirtektar, sí Aktstykke nr. 113.
Lánið til danska statin á 4 mia. kr. er seinni umfíggjað, soleiðis at skuldin til danska statin í dag er 0 kr. Hinvegin hevur landskassin 4,6 mia. kr. í lánsbrævaskuld.